Eg elskar å vera på tur. Eg likar å laga mat og å laga mat på tur er skikkeleg stas.
No har eg fått dilla på å tørka eigen mat til tur. Mattørking er trolldom inni tørkemaskina.
Med 800 gram kjøttdeig kjem ut 210 gram av den same kjøttdeigen, 20 timar seinare.
Fantastisk om du er gramjeger eller planlegg ein langtur og må frakte mat sjølv.
Forslag til middag til 4 personar
150 g tørka kjøtdeig
70 g tørka grønsaker, som lauk, gulrot og sopp.
6 stk tørka jalapeños-skiver
1 pose spicy tomatsuppe
3 posar potetmos med mjølk
Då treng ein berre tilsetta vatn. Bland saman, legg i vatn ei stund før, til dømes ved dagens lunsj, slik at måltidet er klart til middag.
Framgangsmåte
For å tørka din eigen turmat, treng du ein steikeomn med varmluftfunksjon eller ei tørkemaskin. Maskina er som ein vifteomn, og held omlag 50 grader.
Det same må du stille steikeomnen på om du nyttar denne.
Det er ingen stor forskjell på om ein nyttar turkemaskin eller steikeomn, men viss du har ei eiga maskin, kan ein flytta denne ut i gangen eller ein plass ein har høve til å lufte godt, for matlukta kan vera noko intens.
Ein slepp og å okkupera steikeomnen i lenger tid i tilfelle du skulle hatt han til noko anna.
Brukar du steikeomnen må du også hugse på å ha ein gløtt på døra, stikk til dømes ein steikespade i mellom. Turkemaskina har fleire brett, slik at ein kan turke mat i fleire etasjar. Det kan ein også gjera i steikeomnen med fleire steikebrett.
Tørka kjøtt
Eg tørkar for det meste kjøt og grønsaker. Frukt, bær og sopp er og kjempefint å tørke.
Døme på kjøt er steikt kjøtdeig, eller helst karbonadedeig som ikkje har så mykje feitt, i tilfelle ein er redd det harsknar under lagring.
Eg har og prøvd å tørka biffkjøt som eg har skåre fint.
Smaken vert god, men eg tykkjer det har vanskeleg for å trekka til seg væska att, det vert noko turt og hardt.
Karbonadedeigen er fin fordi det er i tynne strimler og kjøtet kjem tilbake til normal storleik og smak relativt fort.
Tørka grønnsaker
Dei grønsakene eg brukar mest er gulrot, brokkoli, mais, lauk, kvitlauk, og chili.
Hermetisk ananas er og fint å turka og gjer seg bra i gryteretten.
Gulrot og brokkoli gir eg eit raskt oppkok i vatn med litt buljong. Så silar eg av og legg dei ut på brettet.
Grønsakene treng omlag 12 timar på å verta heilt turre, medan kjøtet treng omlag 20 timar.
Når det er ferdig tørka, legg eg det i ein pose og merker det. Nokre gonger er det vanskeleg å sjå kva det er etter at det har skrumpa inn. Som sausbasis brukar eg gryterett eller saus på pose.
Currypasta og kokosmjølkpulver er ein fin kombinasjon som saus, eller du kan bruka fantasien til å finna på noko du tykkjer er godt.
Råvarene held på næringsinnhaldet når dei vert turka, og smaken held seg bra.
Turmatekspertens tips
Skal ein vera på tur ei stund er det lurt å ta med smør eller olje for å tilsetta det i maten. Vanskeleg å turka feitt, og det må kroppen ha, samstundes som det smakar godt.
Ta med krydder! Chili, kvitlauk, buljong, salt og pepar.
Det beste tilbehøret
Noko attåt må ein ha, som for eksempel potetmos, pasta, ris eller couscous.
Dette får ein heldigvis kjøpt ferdig tørka, og her må ein berre tenkja på kor mykje energi ein vil bruka for å få det etande.
Potetmos og couscous skal berre svella i vatnet, medan pasta og ris må koka relativt lenge, som då betyr at du må ha meir drivstoff.
Et ute
Sigrid Henjum er turmatekspert i UTE. Dei beste oppskriftene er samla i turkokeboka «ET UTE»
