Tenk at du kan servera denna klassikaren til fjells, laga på primus!
Det blir ikkje vanskeleg å imponera nokon no.
Når det er minusgrader ute hugs at fløytepakken kan fryse. Det går fint, berre skjer av botnen på pakken, tøm ut fløyte-isbiten og fres i veg på steikepanna. Soppen og lauken er fint å ha skåre opp på førehand, ellers er framgangsmåten den same!
Biff og potetstappe
Til fire pers.
4 biffar frå 120-200 g pr biff (eg brukte ytrefilet av angus)
Godt smør (250 g pakke) til steiking og potetstappa
1 pakke fløyte
1 liten gul løk
2 nevar med god sopp, aromasopp eller kantarell
1 kg små poteter eller poteter i bitar
Salt, pepar og gjerne biffkryddermiks
Start med å setta potetene på kok. Dei treng ikkje meir enn 20 minutt når du har små poteter.
Sil av vatnet og tilset ein god klatt med smør. Set vekk panna.
No er det steikepanna sin tur på primusen og ha i ein god klatt smør her også.
Når smøret er litt brunt og skummar godt legg du på biffane og då strør du på litt krydder. Ha god varme og svi alle sidene godt. Krydre alle sidene. Kjenn på kjøtet, det skal vera litt mjukt, men som ein halvstram tommelmuskel, om du vil ha det medium steikt.
Når det er gjort, løftar du biffane over på eit fat slik at dei får kvila seg. Ha no i sopp og løk i små bitar, i panna som framleis har godt med smør og krydder.
Steik til løken er blank før du heller på nesten heile fløytepakken. La det koka godt medan du rører rundt. Smak til om du treng meir salt og krydder i.
Medan sausen kokar inn, heller du resten av fløyten på potetene og så kneftar du og skjer på kryss og tvers oppi panna med ein kniv. Strø oppi litt salt og pepar. Vips, så har du ei grov potetstappe.
Legg stappa på eit fat, biffen på toppen og hell over med varm saus.
Skål!
TIPS!
På turar der vekt og plass er avgjeranda, byt ut ekta potetstappa med pulver-varianten.
Sigrid Henjum er fast turmat-skribent på utemagasinet.no. Finn fleire oppskrifter!
