Pizza med sopp og squash

Soppen finn du i skogen og squashen er ein utrueleg villig grønnsak som er lett å dyrke i eigen hage eller på verandaen.

Har du ikkje dyrka squash, så veit du kva du skal gjera neste vår!  

Det er garantert nokon rundt deg som har for mykje squash, eller så finst det norsk squash på butikken. Sopp er gratis i skogen, han berre ventar på at du skal komma å plukke. Ingenting er lettare å omsette på tur enn pizza.

Tidlegare har vi laga pizza på bål og calzone, eller innbakt pizza. No skal du få inspirasjon til ein lett middag; Pizza med sopp og squash.  

 Lag gjerne deigen på førehand, han står seg godt i kjøleskapet eller ute i kjøleskapstemperatur lenge. Eller gjer du det veldig lett, og bruk polarbrød som pizzabotn. Det gjorde eg denne gongen. Det treng ikkje alltid vera så avansert og det er lov å juksa litt av og til!   

Deig 

Nok til 6-7 pizzabotnar, alt etter kor stor steikepanne du har  

 3 dl vatn eller mjølk (mjølk gjer at pizzaen ikkje blir like fort svart) 

1/3 tørrgjær-pakke  

Om lag 7 dl kveitemjøl eller speltmjøl 

Eit knip med salt 

Rør det tørre i hop først og spe på med væske. Vil du bruka deigen på direkten, brukar du helst varm væske (38-39 grader), men skal du bruka deigen først dagen etter eller seinare kan du bruka kald væske og setta deigen ute eller i kjøleskap.

Hev til dobbel storleik før du klappar små runde kaker og jobbar dei litt større mellom fingrane før du legg dei i steikepanna.

Steik botnen nokre minutt på kvar side før du har på fyllet.  

Saus 

1 boks Crème Fraîche 

2 finhakka eller pressa kvitlauksfedd 

Salt 

Pepar 

Eventuelt litt finhakka timian, bergmynte eller oregano 

Fyll 

Så mykje sopp du finn, av valfri sort, eg har brukt kantarell 

1-2 squash 

Ost, både chèvre og raspa kvitost er knallgodt 

Litt salt og pepar på toppen

Pynt med friske urter eller gauksyre  

Bland gjerne sausen saman heime og ha alt i ein brødpose. Då kan du berre laga eit lite hol i hjørnet på posen og sprøyta på botnen.  

Steik soppen litt først for å få ut vatnet. Når vatnet har fordampa, legg i tynne skiver av squash, saman med litt smør eller olje.

Steik i nokre minutt til soppen får litt brunfarge. Set steikepanna tilside om du har to, eller hell soppen og squashen i noko anna om du berre har ei steikepanne. 

Legg polarbrødet eller deigen i steikepanna. Steik på begge sider som skildra over, før du har på rikeleg med saus, godt med sopp, squash og ost.

Ha på lok og skru ned varmen. La osten få smelte og server straks.  

Godt måltid!   

Sigrid Henjum er fast turmatspaltist på utemagasinet.no. Mange av de beste oppskriftene er samlet i turkokeboka Et Ute.