Løvetann er ein blomst som er lett å kjenne igjen. Ikkje mange plukkar løvetann som mat, så du slepp å stå i kø. Heile løvetannplanta kan etast, både blome, blad, stilk og rot.
Her får du tips til korleis du kan spise og kva du kan lage av løvetann.
Løvetann er proppfull av C-vitamin og med meir A-vitamin i seg enn spinat! Og den er heilt gratis.
Pynt med løvetannblomst
Blomen er god, den kan du eta slik den er, eller du kan bruka den som dekor både på kaker, i salaten eller på tallerken.
Blada kan brukast i smoothien på morgonen, eller i salaten i lag med anna salat. Bruk då unge små blad.
Kokt løvetann-rot
Rota på løvetann må kokast ei stund for å få vekk bittersmaken, men gjer du det smakar rota litt som gulrot.
Løvetann-sirup
Plukk gule løvetannhovud og rens vekk alt det grøne.
Det gule på blomsten har du i ein kasserolle, så mykje du orkar plukka.
Fyll med vatn, dobbelt så mykje som mengda blomar.
Kok blandinga til vatnet er halvert. Sil då i frå blomen og ha i sukker. Mengda skal vera halvparten av vatn som er att (har du att 1 liter væska, tilset du 5 dl sukker).
La væska og sukkeret koka inn til ein passeleg sirup. Du kan leggja ein drope på eit fat, lata han avkjøla seg og sjå at konsistensen er sirupaktig.
No skal han vera gul, søt og klissete. Perfekt på små glas som gåva eller på kjøkkenhylla.
Sirup kan du også ha i teen heile vinteren for å halda på friske solgule tankar. Den passar også godt i brennesle-teen eller på gode ostar.
