Ein liten kjele gjer at du treng mindre olje. Frityrolje kjøper du på matbutikken.
Kva du vil frityrsteika er opp til deg – «påmfri», berlinerboller eller kva med fritert banan? Eg ville testa «fish’n’chips», midt på Finnmarksvidda.
Eg tykte det var nok med ein ting i olje, så difor vart det «fish ́n mos» i staden..
Utstyr
Kokeapparat
Kjele med lokk
Gass
Ingredienser
Pannekakerøre (enten pulver som ein rører ut med vatn, eller ferdig røre heimefrå)
Nok fisk (rekn med om lag 150-200 gram per person)
Salt og pepar
Rotmospulver og vatn
1 liter frityrolje
Slik vart det
Eg sette meg til i forteltet, med døra open og eit lok tilgjengeleg. Det er viktig å passa på at oljen ikkje tek fyr, for det kan skje om det vert for heitt.
I så tilfelle må ein sløkka med å ha på eit lok, ikkje ha på snø eller vatn, då vert det eksplosjon! Det er difor lurt å prøva dette under open himmel.
Eg skaffa meg ein fin skrei i nord, så hovudingrediensen var på plass. Det vart eit par minusgrader, så fisken vart halvfrosen før eg rakk å angripa han.
Eg laga pannekakerøre av pulver frå pose, med litt ekstra salt og pepar i, og hadde mindre vatn enn normalt i røra, slik ho vart tjukk og fin.
Så kokte eg opp vatn før eg varma oljen, slik at eg kunne gjera mosen ferdig. Eg blanda vatn med rotmospulver, og mosen kunne venta på selskap.
Oljen varma seg opp og det bobla små bobler. Eg plasserte ein liten dråpe med røre oppi for å sjå at han vart brun. Så rørte eg fisken inn i røra, og la oppi ein bit i oljen. Spanande!
Det fresa godt rundt biten, men den sette seg fast i botnen. Eg pirka han laus og så bobla han fritt rundt. Når deigen rundt var vorten fin og brun, fiska eg han opp.
Sidan me var både kalde på fingrane og godt svoltne, åt me den feite fine fisken etterkvart som han kom opp or oljen. Så utruleg godt! Ferskt, salt, feitt og varmt – då treng ein ikkje meir!
Sigrid Henjum er fast turmatspaltist i UTE. Mange av de beste oppskriftene er samlet i turkokeboka ET UTE.
