Fjelltur til Dravlausegga i Sykkylven

Det er fjell i alle himmelretningar, og mange av dei har enno snø på toppane. Kombinasjonen av ein speglblank fjord, strålande sol og kvite fjelltoppar skapar den rette stemninga for ein tur.

I dag har vi planlagt å forsere sjølve himmelvegen mellom Straumsdalen og Velledalen, egga mellom Dravlausnyken og Straumshornet. Turen er populær blant lokale fjellfolk, men er lite kjent utanfor Sykkylven.

Fjellpartiet blir kalla både Dravlausegga og Straumsdalsegga, men på kartet står det berre Egga.

Vi køyrer innover langs Sykkylvsfjorden frå kommunesenteret Aure. På austsida av vegen reiser det mektige Straumshornet seg.

Det ser ut til å gå rett ned i Sykkylvsfjorden. Herfrå ser fjellet høgare ut enn sine beskjedne 976 meter over havet. Straumshornet er ein strålande tur, men i dag skal vi til baksida av dette landemerket.

Til Koppen på Dravlausegga

Vi finn lett parkeringsplassen like ovanfor riksvegen på Hjorthol. Du veit at du har kome på rett stad når du ser eit skilt med ei pil som peikar oppover, utan tekst, men det heng ein kopp der.

For første mål på turen er Koppen, bandet der Velledalen først møter Straumsdalen.

Råsa opp gjennom den tette skogen er bratt, men vi har god tid, så ingen grunn til å leggje ut for hardt.

Det er eit heilt anna landskap som møter oss oppe på Koppen. Her opnar alt seg.

Nede i Straumsdalen ser vi Langenesvatnet, med dei ville Hammarsettindane på austsida og målet for turen vår på vestsida. Snur vi oss mot Velledalen igjen får vi tindepanoramet i Brunstaddalen, Vellseterdalen og Gullmordalen rett imot oss.

Vi følgjer råsa mot Dravlausnykjen og Egga oppover til venstre når vi vender oss mot Langenesvatnet igjen.

Det er fin rås oppover, og vi kjem først til utsiktspunktet Tretindane. Deretter er neste målet sjølve Dravlausnyken. 

Sibyllas spådom

Her er det ei stor sprekke i fjellsida, og det knyt seg ein spådom til denne sprekka.

Det blir fortalt om ei sgøynarkvinne kalla Sibylla, som for over 100 år sidan spådde at eit stort stykke av Dravlausnyken skal falle ned i Fetvatnet og forårsake ei stor flodbølgje.

Det høyrer med til historia at Sibylla har forkynt liknande spådomar fleire andre stader nordover langs kysten, og alle fjella står framleis.

Utsikta er formidabel til alle kantar under oppstiginga til Dravlausnyken, og her passar det med ein god rast. Men det er først her turen over Egga startar. Når vi ser utover ser det lite tilgjengeleg ut. Det er ei smal og til tider bratt egg, med stup nedover på begge sider.

Vi har så vidt starta på turen utover egga når vi høyrer eit kraftig brak i fjellet bak oss. Det ramlar steinar ned frå Dravlausnyken, og det går eit støkk gjennom turfølgjet. Vi har nettopp snakka om Sibylla og spådommen. Men det var visst berre eit lite steinsprang, som slett ikkje er uvanleg i så bratte fjellsider.

Det er restar av eit gjerde langs råsa. Det var eit forsøk frå sauebøndene i Straumgjerde på å hindre at dyra skulle gå seg skårfaste på ei fjellhylle på velledalssida. Det gjekk ein del dyr tapt på denne måten.

Ver obs på restane av dette gjerdet slik at du ikkje snublar i det.

Det er viktig å halde seg på råsa. Sauene som laga trakket visste nok kva dei gjorde. 

Det går bratt opp og ned fleire stader, og det er temmeleg luftig her og der, men held du deg til den tydelege råsa så er du trygg.

LES OGSÅ: Hjørundfjorden rundt

Formidabel utsikt på Dravlausegga

Ruta er spektakulær og har det meste du kan krevje av ein fjelltur. Det går opp og ned på den smale egga heilt til vi kjem ut til varden på det høgste punktet på litt under 1100 meter.

Vi går vidare utover mot Straumshornet, men etter nokre hundre meter til kjem vi ikkje lenger. Skal ein vidare herfrå må ein gå over til klatring, og det har ikkje vi utstyr til.

Utsikta er formidabel. Nede til venstre ser vi Fetvatnet, som går over i elva Straumen, som skal vere den minste lakseelva i Nord-Europa. Straumen går vidare ut i Sykkylvsfjorden, ei sidearm til Storfjorden. Ved elva ligg den vesle tettstaden Straumgjerde.  

Langt der ute ser vi Ålesund og øyane utanfor. Over alt rundt oss kneisar det fjell og tindar, vi ser toppane på dei ville tindane som stuper rett ned i Hjørundfjorden. Det er ikkje mogleg å sjå seg mett på dette vakre landskapet, og vi snakkar om at denne fjellegga slett ikkje står tilbake for nokon av dei langt meir kjende eggene her i landet.

Ifølgje ei turbok er dette den turen på Sunnmøre der ein kan sjå flest «ville småbrear».

Vi går same vegen tilbake. Det er mogleg å gå ned til Langenesvatnet frå Egga, men det er ein langt finare tur å følgje råsa tilbake til Koppen.

Vi vel å gå ned til sørenden av Langenesvatnet derfrå, og her er ei fin sandstrand og ein flott leirplass. Slett ikkje dumt å ta eit bad her.

Langs Langenesvatnet

Vi følgjer råsa langs austsida av vatnet til den idylliske Langenessetra, der det er ein del hytter. Herfrå følgjer vi setrevegen, som endar i Straumgjerde. Litt borte i lia ser vi Hindaholsetra , og eit stykke lenger bak anar vi også Gimsdalssetra.

Vi tek til venstre i krysset og held fram ned til Straumgjerde. Nede i Straumgjerde kan det vere smart å stikke innom Fjøla Kafe og Event, som held til  i dei tidlegare lokala til møbelprodusenten Brunstad.

Kafeen og utestaden blir driven av to lokale ungdomar, som også er ivrige fjellfantar. Ved sida av mat og drikke kan det også vanke gode råd om fjellivets gleder og farer, og om turar du kan ta i området. Og det er nok av ruter å velje mellom.

Turen til Dravlausegga og utover Egga er for erfarne fjellfolk. Andre bør ha med seg kjentfolk på turen. Men det er nok av turar i nærområdet også for dei som kvir seg dei brattaste utfordringane.

DRAVLAUSEGGA - SYKKYLVEN

TID: Ca åtte timar på turen som er skildra her.

TIPS: Det kan vere lurt å ha sykkel eller bil ståande i Straumgjerde, for det er nokre kilometer til Hjorthol der vi parkerte bilen tidlegare på dagen.

OVERNATTING: Informasjon om overnatting, fjellaktivitetar og alt anna som Sykkylven har å by på finn du på sykkylven.com. Ålesund og Sunnmøre Turistforening har ei hytte på Vellesetra, med oppgang frå Brunstad i Velledalen.

KART: Kartblad Sykkylven og kartblad Sunnmørsalpane.